Suplemen PA Mamre 4-10 Oktober 2015

Suplemen PA Mamre 4-10 Oktober 2015

Tema      :    Kebayaken si Sea-sea

Ogen      :    Matius 26:14-16

Tujun     :    -    Mamre la ngayaki kebayaken alu la bujur

-     Mamre meteh maka kebayaken alu la bujur meter bene janah babaina kalak ku kebenen

Matius 26:14-16

26:14 Jenari sekalak i bas ajar-ajar si sepuluh dua e, gelarna Judas Iskariot lawes ndahi imam-imam si mbelin.

26:15 Nina man imam-imam si mbelin e, "Kai iberekenndu upahku adi kuendesken Jesus man bandu?" Minter ibereken imam-imam si mbelin e telu puluh duit pirak man Judas Iskariot.

26:16 E maka mulai i bas wari e idarami Judas dalan ndudurken Jesus.

Bena Kata

Ngerana kerna kebayaken tentu kerina manusia merincuh bayak ibas kegeluhenna. Erbage upaya siilakoken manusia khususna ibas erbintuas erdahin pe lit nge hubungenna gelah ndatken kebayaken. Pengertin umum banci siantusi maka iakap kebayaken e maba kita nggeluh ku si jore. Gia labo jaminen maka kebayaken pasti nari kita ndatken kemalemen ate, jore ras dame, tapi niakap maka adi bayak lebih baik asangken cukup apalagi musil. Labo tersalahi ibas pengertin enda, tapi siperlu sirenungken uga nge caranta/ perjuangenta ndatken kebayaken e. enggo nge payo entah lang ? Payo sinimaksud tentu berhubungen ras kinitekenta selaku anak Dibata. Sebab Dibata nehken kekelengen simbelin man banta termasuk kebayaken segelah kita ndatken kemalemen ate, bagepe arah kita ka kalak sideban pe ndatken kemalemen ate. Ertina kebayaken eme pasu-pasu Dibata man banta janah arah pemereNa e kit ape jadi pasu-pasu man kalak sideban.

            Alu pengertin sibagenda maka ibas PA Mamre Minggu enda iingetken kita kerna perjuangennta ndatken kebayaken gelah ibas perjuangen e payo pendalankenta segelah ibas kita ndatkensa la jadi sea-sea/la erguna apalagi justru mpeturah persoalen ibas kegeluhen enda. Arus sisadari maka kerina siibereken Dibata situhuna guna kiniulinta, tapi megati pemereNa e lanai maba kiniulin sebab lanai siakap lit peran Dibata ibas kai siidatken kita ibas kegeluhen enda (termasuk kebayaken).

Matius 26:14-16

Bahan PA Mamrenta enda nuduhken uga murid Yesus eme Judas Iskariot ngelakoken sada persekongkolen ras imam-imam simbelin guna nangkap Yesus. Gia erbage penafsiren kerna engkai maka ilakoken Judas sibage rupana (apakah kerna Keserakahen, kekecewaan entahpe siasat Judas) tapi siidah maka  Judas ngaloken 30 duit pirak si umum ikataken Judas ndayaken Yesus. Perbahanen Judas enda nuduhken uga ia ngelakoken sada pendahin guna kiniulinna saja. Banci ka pe siertiken gelah meter jore persoalen payo ras lang iabaiken.  Keserakahen Judas entahpe kekecewaanna man Yesus mpepetang mata perukurenna selaku pengikut Yesus. Janah banci siidah maka kedungenna seh nge bagi siisurakenna : Yesus itangkap, tapi banci siidah kekecewaan Judas ibas ia ngidah siialami Yesus, erkadiola ia, jenari ibas perasaan ersalah enda ibunuhna bana. Ertina kai siibahanna ibas si la mehuli e labo maba kiniulin, kedamen tapi justru maba kendelen ate bahkan kebenen. Payo memang penyesalen lalap nge terlambat rehna.

            Arah bahan enda erlajar kita selaku mamre ibas jamanta enda gelah ula ka min sialami sada penyesalen arah kai siilakoken kita. Erbintuas erdahin payo enda jadi tanggung jawabta, tapi perlu ka sisadari erdahin ibas erti payo. Erbage-bage tawaren ibas doni enda gelah kita meter jore tapi perlu ka kita metenget gelah ula ka pagin kita erkadiola. Erdahin lah kita alu payo, si la man kuiten lapadeh sikuit : misalna erjudi, si akap kari jore nari sekale adi menang ateta, banci jadi menang ka nge kita tapi siingetlah maka kemenangen e maba kesusahen kange man banta, apalagi ka siakap menang tapi kalah ka, sie kerina justru mpeturah masalah simbaru : perjengilen ibas jabu, bahkan banci ka kita musil pe. Adi sienda nge erbahanca kita jadi nggeluh susah, labo man salahen Dibata la nehken kekelengen man banta, siperlu eme pengakun salah ras ertobat, erdahin ka kita alu payo tentu maba kiniulin.  Bagepe lit ka tawaren gelah meter jore/bayak, dahin si la payo sidahiken :nangko, ngerampas hak kalak sie kerina pasti la maba kiniulin. Adi kita erdahin, tutusilah, janah setialah, ula min kita tergiur ibas cara-cara instant/sementara, gelah meter jore, silakoken korupsi, rsd.

            Iajuk kita ibas PA Mamre enda jadi mamre si payo ibas ndahiken dahinta. Gia langa sikap inganta erdahin, langa mencukupi ulih pendahin e, kitiksa denga gia siakap gajinta ibas dahin e, siperlu eme kesetiaan ras ketutusenta, tentu sikitik ras si sitik e banci jadi mbelin. Mbelin gia ulih siidatken kita tapi adi labo payo cara pendahinta e maka sie kerina jadi sea-sea janah maba kesusahen ngenca man banta bagepe keluarga rikut ras kalak sideban. Nggeluh enda arus nge erguna. Selaku anak Dibata pe kita itugasken gelah jadi erguna : man banta, keluarga bagepe kalak sideban. Erguna labo muat Buena banci sibereken man kalak sideban tapi erguna eme adi ernanam kita man kalak sideban.