PJJ 4-10 Oktober 2015

Suplemen PJJ : 4 - 10 Okt 2015

Tema                 :    “Budaya Ras Injil”

Bahan                :    Matius 5:17-20    

Tujun               :    -Gelah ngawan ni Perpulungen meteh maka kerehen Yesus ku doni labo meneken Undang-undang

                               -    Gelah ngawan ni perpulungen melestariken budaya Karo si la bertentangen ras kiniteken (Injil)

Matius 5:17-20

5:17 "Ola iakapndu Aku reh ncedai Undang-undang si ibereken Musa ras si iajarken nabi-nabi. Aku reh labo ncedai, tapi guna nehken si enggo isuratkenna e.

5:18 Ingetlah katangKu enda! Seh masap langit ras doni, sada titik ntah sada bagin si kitikna pe i bas Undang-undang e la bene adi langa kin seh kerina kai si enggo isuratken e.

5:19 E maka ise la ngikutken si enggo isuratken e, aminna gia bagin si kitikna, janah ibabaina papak kalak si deban, ia me si la mehergana i bas Kinirajan Surga. Tapi ise ngikutkenca janah ibabaina kalak si deban ngikutken si enggo isuratken e, ia me si mbelinna i bas Kinirajan Surga.

5:20 Kukataken pe man bandu maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi."

Bena Kata

Ibas kegeluhenta I pertibi enda lit aturen siarus sidalanken guna banci ka kita nggeluh ibas kiniraturen la terjeng man banta tapi pe man kalak sideban. Aturen silit tentu “ngiket kita” segelah ula ka kita nggeluh erbana-bana. Bage pe aturen entah pe undang-undang si enggo lit mabai kita nggeluh siergaan bagepe sikeleng-kelengen. Aturen si ipeseh Dibata arah suruh-suruhenNa pe tentu nuduhken keleng ate Dibata man manusia segelah manusia ndatken kemalemen ate ibas kegeluhenna bagepe ibas hubungen sada ras sidebanna. Kerehen Yesus ku doni enda nuduhken keleng ateNa simbelin man kita tinepaNa guna banci kita ndatken keselamaten. Sienda nuduhken maka Yesus reh labo ncedai kai sienggo ilakoken Dibata guna kiniulin manusia tapi menyempurnaken kai sienggo ibahan Dibata janah tujunna kerina guna kiniulin manusia. Bagem ibas PJJ Minggu enda tole iingetken kita kerna keleng ate Dibata ibas diri Yesus Kristus nandangi kita manusia guna kita ndatken keselamaten situhu-tuhu.

Matius 5:17-20

Bahan enda eme bagin ibas pengajaren Yesus arah Kotbah I bukit/uruk, siipesehNa guna kiniulin kerina anak-anakNa. Pengajaren siipeseh Yesus ibas erti orat nggeluh man manusia labo ibas erti pertentangen si selama enda enggo lit : tradisi/budaya (Yahudi), tapi guna menyempurnaken pengertin si lit ibas manusia.

Arah Matius 5:17-20 icidahken penulis uga Yesus mereken pengertin kerna kerehenNa sekaligus pandangen entah pe banci pembelaan kerna kerehenna e maba kiniulin ibas undang-undang entah aturen si enggo lit (taurat Musa). Kebiaren, persaingen entah pe banci perasaan tersisihken ibas kalangen ahli-ahli Taurat termasuk si ncikep paguh tradisi keJahudian ibas paksa sie igambarken Yesus maka kerehenNa labo ncedai tapi melengkapi, ndalanken bahkan menyempurnaken undang-undang si lit. Ertina Taurat Musa bagepe tradisi siidalanken kalak Jahudi paksa sie labo iganggu gugat entahpe meneken aturen e tapi justru menggenapinya. Pengajaren Yesus tole nuduhken maka arus tetap tutus ndalanken kerina aturen/undang-undang silit termasuk hal-hal si kitik pe. Ertina pengajaren enda nuduhken uga kita arus setia termasuk ibas hal kitik. Kerehen Yesus termasuk banci sikataken ibas kerehen Injil labo ncedai kai silit sienggo iwarisken man banta tapi menerangi silit e bahkan menyempurnakensa.

APLIAKSI

            Kai sienggo ilakoken leluhurta janah terus idalanken secara terus menerus njadiken sie ibas pengertin budaya. Ibas jamannta genduari sisadari maka perkembangen jaman sibage pedasna perlu kita metenget rikut ras waspada ibas melala perubahen si lit. Perkembangen si pesat enda labo ka nuduhken maka kerina si “adi” /sindekah e lanai payo ibas jaman modern enda. Perlu bijak sinimaksud eme alu tetap lit filter/penyaring segelah la kita kebenen identitasta ibas kegeluhen enda. Bali bagi Yesus reh labo ncedai silit, tentu sisadari maka kerehen Injil ku kalak Karo khususna labo ka meneken identitas Karo ibas kalak karo. Budaya Karo sienggo iwarisken tentu adi bijak kita ngenehen makna-makna silit ibas budaya e tentu siidah maka kalak Karo nggeluh ibas budaya kekelengen simbelin. Iketen kekerabaten irakut jadi iketen sinteguh ibas erti rakut sitelu, irangkai ibas hubungen kekerabaten simegegeh ibas kiniersadaan gia ibas perbedaan Merga (Merga silima) (Tutur siwaluh), keberadaan enda nuduhken hubungen/relasi si megegeh ibas ndalanken kegeluhen sikeleng-kelengen.

Adi bage kai gunana kerehen Injil ? Uga maka kerehen Injil justru megati terkikis makna-makna kekelengen ibas kegeluhen kalak Karo ? Injil me pengajaren kekelengen simbelin nge si icidahken ? Erbage-bage penungkunen seputar perjumpaan Injil ras Budaya, siperlu sirenungken maka Injil labo reh guna ncedai kai sienggo lit ibas manusia (termasuk budaya) tapi kerehen Injil eme nggenapi, menyempurnaken kai sienggo lit ibas manusia. Alu bage pengajuk man banta ibas jamanta enda selaku kalak sierkiniteken sekaligus selaku kalak karo silit budayanta, ngergai silit e alu ndalanken sipayo sentudu ras sura-sura Dibata. Yesus labo meneken identitasta selaku kalak karo tupung kita tek/ngaku jadi anakNa (ertina tek kita man Yesus, payo kita jadi kalak Kristen, tapi sekaligus selaku kalak Karo. Hubungen kekerabaten, penggunaan bahasa, pendalanken kerna orat nggeluh arus terus sicidahken sebab sie gambarenta selaku kalak sierkiniteken.

Jadilah kalak Karo si berbudaya sierkiniteken. Setia..Setia..Setia..